From :
.. the voice
.jpg)
မြန်မာနိုင်ငံရေး ဂုရုကြီးတွေနဲ့ မီဒီယာသမားတွေ မပြောရဲ၊ မရေးရဲတဲ့ အတိတ်နဲ့ အနာဂါတ် ၂ ခုရှိတယ်။ ဒေါ်စု မြန်မာနိုင်ငံ ပြန်မရောက်ခင်၊ ၁၉၈၈ မတိုင်မီ နိုင်ငံရေးမလုပ်ခင် က နေ့စဉ် ဘာတွေလုပ်နေခဲ့လဲ ဆိုတဲ့ အကြောင်းနဲ့ ဒေါ်စု သမ္မတဖြစ်သွားရင် မြန်မာ့နိုင်ငံရေး ဘယ်လိုဖြစ်သွားမယ် ဆိုတဲ့အကြောင်းဖြစ်တယ်။
ဒေါ်အောင်ဆန်းစုကြည် သမ္မတ ဖြစ်လာခဲ့ရင်ဆိုတဲ့ နောက်ဆက်တွဲကို ဘယ်သူမျှ ကြိုပြီးမရေးကြသေးဘူး။ နိုင်ငံရေး အကဲဆတ်သူတွေကတောင် နှုတ်ပိတ် ရေငုံနေကြတယ်။ နိုင်ငံရေး ဂုရုတွေကလည်း ဒေါ်အောင်ဆန်းစုကြည် သမ္မတ ဖြစ်လာရင်ဆိုတဲ့ နိုင်ငံရေး မိုးလေဝသကို ကောင်းစွာသိကြတယ်။ ဒါပေမဲ့ သူတို့လည်း ရေငုံနှုတ်ပိတ် နေကြတယ်။ ဘာကြောင့်လဲဆိုတော့ ဒေါ်အောင်ဆန်းစုကြည်ဟာ လက်ရှိ အနေအထားမှာ တို့ထိလို့မရတဲ့ ဆတ်ဆတ်ထိ မခံသူတစ် ယောက် ဖြစ်နေလို့ပဲ။
ဒေါ်အောင်ဆန်းစုကြည် ကိုယ်တိုင် ဒီမိုကရေစီကို အမှန်တကယ် လိုလားမြတ်နိုးသူမှန်ရင် သူ့အပေါ် အကောင်းဝေ ဖန်ရင် လည်း ခံနိုင်ရမယ်။ မကောင်းဝေဖန်ရင်လည်း ခံနိုင်ရမယ်။ ဒေါ်အောင်ဆန်းစုကြည် ကိုယ်တိုင်လည်း ပညာတတ်၊ ဒီမိုက ရေစီကို တန်ဖိုးထားသူ ဖြစ်တာကြောင့် သူ့ကိုဝေဖန်လည်း လက်ခံမယ် ထင်ပါတယ်။ ဒါပေမဲ့ နိုင်ငံရေး ဒီရေတက်နေချိန် ဖြစ်သောကြောင့် ဒေါ်အောင်ဆန်းစုကြည်ကို အပြစ်တင် ဝေဖန်လို့ မရဘူး ဆိုတာက သူ့ကိုချစ်ရာ မရောက်ဘဲ တစ်ဖက် သတ် အစွန်းတရား ရောက်အောင် တွန်းပို့ပေးနေသလို ဖြစ်နေတယ်ဆိုတာ သတိပြုသင့်ပါတယ်။
ကျွန်တော်တို့ လေးစားရတဲ့ ကုလသမဂ္ဂ အတွင်းရေးမှူးချုပ် တာဝန်ကို ထမ်းဆောင်ခဲ့ဖူးသူ ဦးသန့်ဟာ ဒီမိုကရေစီကို ‘အများသဘောဟာ အမှားပေါတယ်’ လို့ ဝေဖန်သွားခဲ့ဖူးတယ်။ အဲဒါ လွန်ခဲ့တဲ့ နှစ်ပေါင်းများစွာ ကတည်းက ဦးသန့်က သူရေးတဲ့စာစုမှာ ထည့်ရေးသွားခဲ့တာ။ ခုလို ဒီမိုကရေစီ ရေချိန် တက်နေချိန်မှာ ဦးသန့်က အဲဒီလို လာပြောရင် ပယ်ပယ် နယ်နယ် ဝိုင်းတွယ်ကြမှာပဲ။
မကြာသေးမီက ထိုင်းနိုင်ငံက ပူပူနွေးနွေး အလှမယ်ဘွဲ့ ရထားသူလေး တစ်ယောက်ဟာ သူအလှမယ်ဘွဲ့ မရခင်က ရှပ်နီအဖွဲ့သားတွေ ဘန်ကောက်မှာ ရမ်းကားနေကြပုံကို တွေ့ပြီး စိတ်ပျက်သွားဟန် တူပါတယ်။ ဘုရင်စနစ်နဲ့ ကိုယ့်ခေါင်းဆောင်ကို ပြန်သတ်ချင်နေတဲ့ လူရမ်းကားတွေ၊ ရှင်တို့ကြောင့် ထိုင်းနိုင်ငံကြီး ညစ်နွမ်းနေရတယ်လို့ နာမည်ကျော် လူမှုကွန်ရက် တစ်ခုဖြစ်တဲ့ Facebook ပေါ်မှာ ဝေဖန် ရေးသားလိုက်တယ်။ သူလည်း အလှမယ်ဘွဲ့ရရော ရှပ်နီကို ထောက်ခံသူတွေက သူမကိုဝိုင်းပြီး ဆဲတဲ့အပြင်၊ ယုတ်မာ ရိုင်းစိုင်းစွာပြော၊ မိသားစုကို ခြိမ်းခြောက်တာကြောင့် သူ့ခမျာ အလှမယ်ဘွဲ့ကို ပြန်အပ်လိုက်ရတယ် ဆိုတဲ့သတင်းဟာ ဒီမိုကရေစီကို လွန်ကျူးစွာ စားသုံးနေကြပြီလို့ ဖော်ပြရာ ရောက်နေပါတယ်။
လူတိုင်းလွတ်လပ်စွာ ခံစားခွင့် ရှိပါတယ်။ လူတိုင်း မည်သူ့ကိုမဆို ကြိုက်ခွင့်လည်း ရှိတယ်၊ မကြိုက်ခွင့်လည်း ရှိတယ်။ ငါနဲ့မတူ ငါ့ရန်သူ၊ ငါမကြိုက်တာကို လိုက်ကြိုက်သူ ငါ့ရန်သူ၊ ငါကြိုက်တာကို လိုက်မကြိုက်သူ ငါ့ရန်သူ၊ ငါထောက်ခံ တာကို လိုက်မထောက်ခံသူ ငါ့ရန်သူဆိုတဲ့ အတွေးအမြင် အယူအဆတွေဟာ ဒီမိုကရေစီ မဟုတ်ပါဘူး။
လူတိုင်း လွတ်လပ်စွာ ကြိုက်ခွင့် မကြိုက်ခွင့် ရှိပါတယ်။ ရွေးချယ်ပိုင်ခွင့် ရှိပါတယ်။ ငါကြိုက်တာကို လိုက်ကြိုက် ရမယ်ဆို တာ ဒီမိုကရေစီ မဟုတ်ပါဘူး။ အဲဒါ အာဏာရှင်ပါ။ အဓမ္မလိုက်ပြီး လုပ်ခိုင်းတာ မှန်သမျှ အာဏာရှင် တွေရဲ့ လုပ်ရပ် တွေပါ။
လွတ်လပ်စွာတွေးမြင်ခွင့်၊ ဝေဖန် ခွင့်အပြင် ဇောက်ထိုးတွေး၊ ဆန့်ကျင် အတွေးတွေဟာ တစ်ခါတလေ အမှန်ကို မြင်စေ တတ်ပါတယ်။ နောက်က ပုဆိုးပေါက်ကို ကိုယ်တိုင် မမြင်လို့ နောက်တစ်ယောက်က ခင်ဗျားပုဆိုး ပေါက်နေ တယ်လို့ လာသတိ ပေးသူကို ခင်ဗျားတို့ အပြစ်မြင်မှာလား။ ပုဆိုးပေါက်တာကို ပုဆိုးပေါက်နေကြောင်း လာပြောသူကိုပဲ အမှန်ကို သိစေလို့ ကျေးဇူးတင်ရမလား ကွဲကွဲပြားပြား ခွဲခြားသင့်ပြီလို့ ထင်ပါတယ်။
.
. www.MyanmarExpress.net
0 comments