"ဇာတ်လမ်းကတော့ တော်တော်ကြီးကို ကြမ်းမှရလိမ့်မယ်"
ရေးနိုင်သူများခင်ဗျား။ ဇာတ်လမ်းတစ်ခု အကြံပြု တင်ပြချင်လို့ပါ။ ဇာတ်လမ်းကတော့ ရိုးရိုးပါပဲ။ ဒီမိုကရေစီရ သူများနိုင်ငံတွေမှာ ဒီလိုဇာတ်လမ်းမျိုး ခဏခဏရိုက်လွန်းလို့ သိပ်တောင်မဆန်းတော့ပါဘူး။ ဇာတ်လမ်းက ဒီလို။
နိုင်ငံတော်သမ္မတကို ပြန်ပေးဆွဲတာဖြစ်ဖြစ်၊ လုပ်ကြံဖို့ ကြံစည်တာဖြစ်ဖြစ်။ ဒါမှမဟုတ် နိုင်ငံတော်သမ္မတနောက်မှာ ကြိုးကိုင်တဲ့သူ ရှိနေတယ်ဆိုတဲ့ ပုံစံမျိုးပဲဖြစ်ဖြစ်။ သေချာတာကတော့ ဒီဇာတ်လမ်းထဲမှာဗျာ နိုင်ငံတော်သမ္မတဆိုတာ ပါကိုပါရမယ်။ ပုံစံတူစရာမလိုပါဘူးဗျာ။ ဆံပင် မရှိစရာလည်း မလိုပါဘူး။ ဒီဇာတ်လမ်းကို ရုပ်ရှင်ရိုက်ဖြစ်လို့ နိုင်ငံတော်သမ္မတနေရာမှာ ဇာဂနာ/ဗေလုဝ/ဆင်မ/ဒိန်းဒေါင်/ခင်လှိုင်/သီးလေးသီး/ဖိုက်စတား တစ်ဦးဦးကို သရုပ်ဆောင်ခိုင်းလည်း သိပ်ပြဿနာမရှိဘူး။ အဓိကက ဒီဇာတ်လမ်းကျောရိုးထဲမှာ နိုင်ငံတော်သမ္မတဆိုတဲ့ ရာထူးယူထားတဲ့ ဇာတ်ရုပ်တစ်ရုပ် ပါရမယ်။
ခုဆိုရင် ကျွန်တော်တို့ မြန်မာနိုင်ငံကလည်း Slumdog Millionaire ဇာတ်ကားထဲကလို မတူညီတဲ့ လူ့အဖွဲ့အစည်း(၂)ခုအကြားက ရန်ပွဲလိုမျိုးကိုလည်း ထည့်သွင်းရိုက်ပြလို့ ရနေပြီ မဟုတ်လား။ Slumdog Millionaire ဇာတ်ကားထဲမှာလို ဆင်းရဲသားဇာတ်ရုပ်တွေကလည်း ပေါမှပေါ မဟုတ်လား။ Slumdog Millionaire ဇာတ်ကားထဲမှာလို ပဟေဠိနန်းတော်အစီအစဉ်တောင် ရှိနေပြီ မဟုတ်လား။
ထားပါတော့။ ပြောချင်တာက အဲဒီဇာတ်လမ်းပေါ့ဗျာ။ နိုင်ငံတော်သမ္မတ ပါရမယ်။ ဇာတ်လမ်းက နိုင်ငံတော်သမ္မတနဲ့ ပတ်သက်နေရမယ်။ ဇာတ်လမ်းထဲမှာ ဆန္ဒပြပွဲတွေ၊ အဓိကရုဏ်းတွေလည်း ပါရမယ်။ အကြမ်းဖက်တာတွေ၊ အကြမ်းမဖက်တာတွေလည်း ပါရမယ်။ မီဒီယာတွေလည်း ပါရမယ်။ နိုင်ငံခြားဇာတ်ကားတွေထဲမှာလို အကျင့်ပျက်တဲ့ ထောက်လှမ်းရေးတွေ၊ အကျင့်ပျက်တဲ့ ရဲတွေ၊ အကျင့်ပျက်တဲ့ စစ်ဗိုလ်ချုပ်ကြီးတွေ၊ အကျင့်ပျက်တဲ့ တရားသူကြီးတွေ၊ အကျင့်ပျက်တဲ့ လွှတ်တော်အမတ်တွေ၊ အကျင့်ပျက်တဲ့ အစိုးရအာဏာပိုင်တွေ၊ အကျင့်ပျက်တဲ့ ၀န်ထမ်းကြီးကြီးမာစတာတွေ စသဖြင့်အကြောင်းတွေလည်း ပါဝင်ရမယ်။ ခရိုနီဇာတ်ရုပ်တွေလည်း ထည့်ချင်ထည့်ပေါ့။ လှည့်ကွက်တွေအများကြီးနဲ့ ဇာတ်လမ်းဗျာ။ အပစ်အခတ်၊ အညှစ်အသတ်တွေနဲ့ ဇာတ်လမ်းပေါ့ဗျာ။
မင်းသားနဲ့ မင်းသမီးကတော့ ဆံပင်နီကြောင်ကိုယ်စီနဲ့ပေါ့။ ခေတ်အကြိုက် ခပ်ပိန်ပိန်၊ ခပ်ဖြူဖြူ၊ ခပ်ဖျော့ဖျော့လေးတွေပေါ့။ အီမိုစတိုင်တွေဘာတွေ လုပ်ထားလည်း ရတယ်။ မင်းသားကတော့ ဆေးမင်ကြောင် ထိုးချင်ထိုး၊ မထိုးချင်နေ။ မင်းသမီးကတော့ ဆေးမင်ကြောင် ထိုးကိုထိုးထားရမယ်။ မင်းသား/မင်းသမီးက ဆေး/အရက်/ဘီယာ/ဆေးလိပ် ချတာမချတာကတော့ ထည့်ရေးချင်လည်းနေ၊ ထည့်မရေးချင်လည်းနေ။ မင်းသားရော မင်းသမီးရော နားတွေ၊ နှာခေါင်းတွေ၊ ပါးစပ်တွေ စသဖြင့်မှာ နားကပ်၊ နှာခေါင်းကပ်၊ ပါးစပ်ကပ်တွေနဲ့ အလှတွေ ဆင်ထားလို့လည်း ရသေးတယ်။ ဇာတ်သဘောအရပေါ့။ အနမ်းခန်း ခပ်ကြမ်းကြမ်းတွေ ပါလည်း ရသေးတယ်။ နိုက်ကလပ်တွေမှာ ကဲကြတာတွေလည်း ထည့်ရိုက်ပြလို့ရသေးတယ်။ ဗီလိန်ကတော့ ထုံးစံအတိုင်း ဆရာဝန်ဇာတ်ရုပ်ကိုပဲ ထည့်သွင်းကြတာပေါ့။
ဇာတ်လမ်းထဲမှာ ကားတွေ လေပေါ်ဝဲပျံသွားတာတွေ ပါရမယ်။ ငါးလောင်ပြိုင်လူသတ်မှုလို၊ ဖြူးမြို့နယ်ဘက်မှာဖြစ်သွားခဲ့တဲ့ ခေါင်းမပါတဲ့ ခန္ဓာကိုယ်ကြီးကို ပီနံအိတ်ထဲထည့် စွန့်ပစ်ထားတာမျိုးတွေဘာတွေ။ ရက်စက်တာတွေလည်း ပါရမယ်။ အဲ... နူးညံ့တာတွေလည်း ပါရမယ်ပေါ့ဗျာ။
ကျန်တာတော့ ရေးနိုင်သူများ ဆက်ရေးကြတော့ဗျာ။ ကျွန်တော်ရေးထားတဲ့ အတိုင်း အကုန် ပါဝင်ရမယ်ရယ်လို့တော့ မဟုတ်ပါဘူး။ ကျွန်တော်ရေးထားတဲ့ ဇာတ်ရုပ်တွေအတိုင်းလည်း ထပ်တူကျရမယ်ရယ်လို့လည်း မဆိုလိုပါဘူး။ မင်းသားကို တောင်ရှည်ပုဆိုး၊ တိုက်ပုံ၊ ခေါင်းပေါင်းနဲ့၊ မင်းသမီးကို သနပ်ခါးပါးကွက်ကြား၊ ထမိန်၊ လုံချည်နဲ့ ဇာတ်ရုပ်တွေ ဘာတွေ ဖန်တီးလည်း ရပါတယ်။ ဒါကတော့ ရေးနိုင်သူများ ကြိုက်သလို ရေးကြပါ။ အဓိကကတော့ ဒီဇာတ်လမ်းထဲမှာ နိုင်ငံတော်သမ္မတဆိုတာ ပါကိုပါရမယ်ဗျာ။ နိုင်ငံတော်သမ္မတကို စွတ်ဖားတဲ့ ဇာတ်ကွက်တွေတော့ စွတ်မလုပ်နဲ့ပေါ့ဗျာ။
ဒီနေ့ ဒီအချိန် ဒီအခါမှာ ကျွန်တော်ရေးထားတဲ့ ဇာတ်ညွှန်းလိုမျိုး၊ နိုင်ငံတော်သမ္မတဇာတ်ရုပ်ပါတဲ့ ဇာတ်လမ်းမျိုး စထွက်လို့ကတော့ လွှတ်ပေါက်ပြီပဲဗျာ။ ကျွန်တော် အာမခံပါတယ်။ (ခင်ဗျား အဖမ်းခံ/တရားစွဲခံရဖို့။ ခိခိ)
ညိုကြီး
၂၇၊ ၇၊ ၂၀၁၃
http://bigbbrown.blogspot.com
0 comments