တစ်နိုင်ငံလုံးရှိ တိုင်းဒေသကြီးနှင့် ပြည်နယ်အလိုက် အမျိုးဘာသာ သာသနာ
စောင့်ရှောက်ရေး လုပ်ငန်းစဉ် အခက်အခဲများ
ကို ညှိနှိုင်း ဖြေရှင်းရန်အတွက် အမျိုးဘာသာ
သာသနာ စောင့်ရှောက်ရေးအဖွဲ့ ညီလာခံကို
ဇွန်လအတွင်း ပြုလုပ်သွားမည် ဖြစ်ကြောင်း အဆိုပါအဖွဲ့ မှတ်တမ်းနှင့် သုတေသနဌာန ဗဟိုအလုပ်အမှုဆောင် ဦးအောင်မြိုင်က ပြောကြားသည်။
အဆိုပါ ညီလာခံကို ဇွန်လ ၂၁ ရက် နှင့် ၂၂ ရက်တို့တွင် ပြုလုပ်မည် ဖြစ်ပြီး အမျိုးဘာသာ သာသနာ စောင့်ရှောက်ရေးအဖွဲ့ (ဗဟို) ဥက္ကဋ္ဌ အင်းစိန်ရွာမ ပရိယတ္တိစာသင်တိုက် ဆရာတော် တိလောကဘိဝံသ အပါအဝင် သံဃာတော် ခုနစ်ပါးဖြင့် ညီလာခံ ကျင်းပရေး ဦးဆောင်ကော်မတီကို မေလ ၂၃ ရက်နေ့တွင် ဖွဲ့စည်းလိုက်ကြောင်း ၎င်းက ရှင်းပြသည်။
“တစ်မြို့နယ်ကို ဆရာတော် နှစ်ပါးစီ ညီလာခံမှာ တက်ရောက် ဆွေးနွေးဖို့ ဖိတ်ကြားသွားမှာပါ။ ညီလာခံအတွက် အသေးစိတ်ကိစ္စကို ထပ်မံ ဆွေးနွေးရဦးမှာပါ” ဟု ၎င်းကဆိုသည်။
ထို့အပြင် အဆိုပါ ညီလာခံတွင် သီတဂူဆရာတော် အရှင်ဉာဏိဿရထံမှ အမျိုးဘာသာ သာသနာ စောင့်ရှောက်ရေးအဖွဲ့က သြဝါဒ ခံယူမည် ဖြစ်ကြောင်း အမျိုးဘာသာ သာသနာ စောင့်ရှောက်ရေးအဖွဲ့ (ဗဟို) ထံမှ သိရသည်။
အမျိုးဘာသာ သာသနာ စောင့်ရှောက်ရေး အဖွဲ့က တိုက်တွန်း တောင်းဆိုမှုကြောင့် ၂၀၁၄ ခုနှစ် ဖေဖော်ဝါရီလအတွင်း နိုင်ငံတော်သမ္မတ ဦးသိန်းစိန်က ကိုးကွယ်ခြင်း၊ ဘာသာကူးပြောင်းခြင်းဆိုင်ရာ ဥပဒေ၊ လက်ထပ်ထိမ်းမြားခြင်းဆိုင်ရာ ဥပဒေ၊ တစ်လင်တစ်မယားစနစ် ကျင့်သုံးခြင်းဆိုင်ရာ ဥပဒေနှင့် လူဦးရေ တိုးပွားနှုန်း ထိန်းညှိခြင်းဆိုင်ရာ ဥပဒေများကို ပြဋ္ဌာန်းပေးရေး သုံးသပ် စဉ်းစားပေးရန် ပြည်ထောင်စုလွှတ်တော် နာယကထံ သဝဏ်လွှာ ပေးပို့ခဲ့သည်။
ထို့အပြင် အမျိုးဘာသာ သာသနာ စောင့်ရှောက်ရေးအဖွဲ့၏ လုပ်ငန်းစဉ်များသည် သာသနာတော် တည်တံ့ပြန့်ပွားရေးကို အထောက်အကူပြု ဆောင်ရွက်ခြင်း ဖြစ်ကြောင်း ရန်ကုန်တိုင်းဒေသကြီး ကမ္ဘာအေးကုန်းမြေ မဟာပါသာဏ လိုဏ်ဂူတော်အတွင်း မေလ ဒုတိယပတ်အတွင်း ပြုလုပ်သော သတ္တမအကြိမ် နိုင်ငံတော် ဗဟိုသံဃာ့ ဝန်ဆောင်အဖွဲ့ ဒုတိယ အထူးအစည်းအဝေးတွင် သာသနာရေး ဝန်ကြီးဌာန ပြည်ထောင်စုဝန်ကြီး ဦးဆန်းဆင့်က ပြောကြားထားသည်။
The Voice Weekly
0 comments